Выстава “Барыс і Іван Казаковы: постскрыптум”, якая пачне працаваць з 22 красавіка ў Выставачным корпусе музея (К. Маркса, 24), прымеркавана да 85-годдзя Барыса Іванавіча Казакова (1937—2008), жывапісца і графіка, заслужанага дзеяча мастацтваў Беларусі. Экспазіцыя ўключае каля 50 твораў са збораў Нацыянальнага мастацкага музея Рэспублікі Беларусь і Беларускага саюза мастакоў.
На выставе будуць дэманстравацца не толькі закончаныя палотны, але і эцюды, накіды, якія ў большасці сваёй не экспанаваліся раней.
Вобразная пабудова палотнаў, сродкі выразнасці, выбар тэм і сюжэтаў сведчаць, што Барыс Іванавіч Казакоў быў пераважна мастаком драмы і трагедыі. У працах мастака злучаюцца любаванне, зачараванне прыгажосцю свету і разуменне неад’емнай драматычнасці, трагедыйнасці гэтага жыцця.
