У лекцыі «Творы Дзяржаўнай карціннай галерэі БССР: Вярнуць Нельга Забыць» разглядаецца няпросты лёс Дзяржаўнай карціннай галерэі БССР, даваенныя мастацкія зборы якой былі самымі багатымі і разнастайнымі сярод музеяў Беларусі. Асноўная ўвага нададзена наступным этапам існавання ўстановы: фарміраванне калекцыі, рабаўніцтва падчас нямецка-фашысцкай акупацыі і вываз твораў у Германію, вяртанне пасля вайны на радзіму, страты і знаходкі музейных прадметаў з ДКГ БССР. Падводзяцца вынікі даследванняў па выяўленню карцін, абразоў з даваенных збораў за апошнія гады і акрэсліваюцца магчымыя шляхі для далейшых пошукаў “згубленых” твораў.
Сініла Анатоль Мікалаевіч – настаўнік Багушэвіцкай сярэдняй школы Бярэзінскага раёна, суіскальнік аддзела архітэктуры ДНУ «Цэнтр даследаванняў беларускай культуры, мовы і літаратуры Нацыянальнай акадэміі навук Беларусі». Навуковы кансультант выставы «Страты і вяртанні. Лёс мастацкіх каштоўнасцей Дзяржаўнай карціннай галерэі. 1939–1957», прымеркаванай да 80-годдзя з дня вызвалення Беларусі ад нямецка-фашысцкіх захопнікаў і 85-годдзя з дня заснавання Нацыянальнага мастацкага музея Рэспублікі Беларусь.
